Þrennt er það, sem anda mínum þóknast, og það er þóknanlegt frammi fyrir Guði og mönnum:
eining bræðra og kærleikur náunga og maður og kona, sem vel semur.
Þrennt hatar sál mín, og eg hryggist mjög yfir lífi þeirra:
fátækur maður, sem dramblátur er; auðugur maður, sem lygari er; gamall maður, sem heimskur er og elliær.
Það, sem þú hefur eigi safnað í æsku þinni, hvernig munt þú það finna í elli þinni?
Ó hversu fagur er dómur gráum kolli og öldungum að þekkja ráð!
Ó hversu fögur er spekin hinum öldruðu og skilningur og ráð tignum mönnum!
Mikil reynsla er kóróna öldunganna, og ótti Guðs er dýrð þeirra.
Níu hluti, sem hjartað fær eigi ímyndað sér, hef eg mikillað, og hinn tíunda mun eg mæla mönnum með tungu minni:
maður, sem gleði hefur af börnum sínum, og sá, sem lifir og sér fall óvina sinna.
Sæll er sá, sem býr með vitri konu og eigi hefur hrasað með tungu sinni og eigi þjónað þeim, sem hans eru óverðugir.
Sæll er sá, sem finnur sannan vin og sem kunngjörir réttlæti eyra, sem heyrir.
Hversu mikill er sá, sem finnur speki og þekking! En enginn er meiri en sá, sem óttast Drottin.
Ótti Guðs hefur sett sjálfan sig ofar öllu.
Sæll er sá maður, sem gefið er að hafa ótta Guðs; sá, sem honum heldur, við hvern skal honum líkt verða?
Ótti Guðs er upphaf kærleika hans, og upphaf trúarinnar er að vera honum fast tengdur.
Hryggð hjartans er sérhver plága, og illska konu er alt ilt.
Og maður mun kjósa hverja plágu heldur en plágu hjartans,
og hverja illsku heldur en illsku konu,
og hverja þrenging heldur en þrenging af hendi þeirra, sem hann hata,
og hverja hefnd heldur en hefnd óvina.
Ekkert höfuð er verra en höfuð höggorms,
og engin reiði er meiri en reiði konu. Þægilegra mun vera að dveljast með ljóni og dreka en að búa með illri konu.
Illska konu breytir ásjónu hennar, og hún myrkvar svip sinn sem björn og sýnir hann sem hærusekk. Mitt á meðal náunga sinna
stundi maður hennar, og er hann heyrði, andvarpaði hann lítið eitt.
Öll illska er lítil hjá illsku konu; lát hlutskipti syndaranna falla yfir hana.
Eins og að klífa sendinn veg er fótum öldungsins, svo er málug kona kyrrlátum manni.
Lít eigi á fegurð konu, og girnst eigi konu sakir fegurðar.
Reiði konu og ósvífni og ringulreið er mikil.
Kona, ef hún hefur yfirburði, er manni sínum andstæð.
Óguðleg kona dregur úr hugrekki og veldur þungri ásjónu og særðu hjarta.
Máttlausar hendur og liðuð knén — kona, sem eigi gjörir mann sinn hamingjusaman.
Frá konunni kom upphaf syndarinnar, og fyrir hana deyjum vér öll.
Gef vatni þínu enga útrás, eigi hið minnsta, né óguðlegri konu frelsi til að reika um.
Ef hún gengur eigi við hönd þína, mun hún gjöra þig til skammar í augsýn óvina þinna.
Sker hana frá holdi þínu, svo að hún misbjóði þér eigi sífellt.