Gamla testamentiðSaga
Eftir þetta vann Davíð sigur á Filistum og braut þá undir sig; og tók Davíð tauma höfuðstaðarins úr höndum Filista.
Hann vann og sigur á Móabítum og mældi þá með vað, það er að segja: hann lét þá leggjast niður á jörðina og mældi tvo vaði til lífláts og eina vaðlengd til að halda lífi. Þannig urðu Móabítar skattskyldir þegnar Davíðs.
Davíð vann og sigur á Hadadeser Rehóbssyni, konungi í Zóba, þá er hann fór leiðangur til að ná aftur ríki við Fljótið.
Vann Davíð af honum eitt þúsund og sjö hundruð riddara og tuttugu Þúsundir fótgönguliðs. Lét Davíð skera sundur hásinarnar á öllum vagnhestunum og hélt aðeins hundrað hestum eftir af þeim.
Og er Sýrlendingar frá Damaskus komu til liðs við Hadadeser, konung í Zóba, þá feldi Davíð tuttugu og tvö þúsund manns af Sýrlendingum.
Og Davíð setti landstjóra á Sýrlandi, því er kent er við Damaskus, og urðu Sýrlendingar skattskyldir þegnar Davíðs. Þannig veitti Drottinn Davíð sigur, hvert sem hann fór.
Davíð tók og hina gullnu skjöldu, er Þjónar Hadadesers höfðu borið, og flutti þá til Jerúsalem.
Auk þess tók Davíð konungur afarmikið af eir í Teba og Berótaj, borgum Hadadesers.
En er Tóú, konungur í Hamat, frétti að Davíð hefði lagt að velli allan her Hadadesers,
þá sendi Tóú Hadóram son sinn á fund Davíðs konungs, til þess að heilsa á hann og árna honum heilla, er hann hafði barist við Hadadeser og unnið sigur á honum — því að Tóú átti í ófriði við Hadadeser —, og hafði hann með sér gripi af silfri, gulli og eiri.
Þá helgaði Davíð konungur einnig Drottinn, ásamt silfri því og gulli, er hann hafði helgað frá öllum þeim þjóðum, er hann hafði undirokað:
frá Edóm, Móab, Ammónítum, Filistum, Amalek og af herfangi Hadadesers Rehóbssonar, konungs í Zóba.
Og Davíð jók orðstír sinn, þá er hann sneri aftur og hafði unnið sigur á Sýrlendingum, með því að vinna sigur á Edómítum í Saltdalnum, átján þúsundum manns.
Og hann setti landstjóra í Edóm; um alt Edóm setti hann landstjóra, og þannig urðu allir Edómítar þegnar Davíðs. En Drottinn veitti Davíð sigur, hvert sem hann fór.
Og Davíð ríkti yfir öllum Ísrael og lét alla þjóð sína njóta laga og réttar.
En Jóab Zerújuson var fyrir hernum og Jósafat Ahílúðsson var sagnameistari;
Zadók Ahítúbsson og Ahímelek Abjatarsson voru prestar og Seraja kanslari;
en Benaja Jójadason var fyrir Kretum og Pletum, og synir Davíðs voru prestar.