Fyrir því hefur Drottinn, Guð vor, staðfest orð sitt, það sem hann talaði til vor og til dómara vorra, sem dæmt hafa Ísrael, og til konunga vorra og til höfðingja vorra og til alls Ísraels og Júda:
að Drottinn mundi leiða yfir oss mikið ilt, slíkt sem aldrei hefur orðið undir himninum, eins og fram er komið í Jerúsalem, samkvæmt því sem ritað er í lögmáli Móse —
að maður skyldi eta hold síns eigin sonar og hold sinnar eigin dóttur.
Og hann hefur ofurselt þá undir hönd allra konunganna, sem umhverfis oss eru, til háðungar og auðnar meðal alls lýðsins, sem Drottinn hefur tvístrað oss á meðal.
Og vér erum niður lægðir og eigi efstir, af því að vér höfum syndgað gegn Drottni, Guði vorum, með því að hlýða eigi raustu hans.
Drottni, Guði vorum, heyrir réttlætið til, en oss og feðrum vorum skömm ásjónunnar, eins og á þessum degi.
Því að Drottinn hefur upp kveðið gegn oss alt þetta ilt, sem yfir oss er komið.
Og vér höfum eigi blíðkað ásjónu Drottins, Guðs vors, að vér mættum hverfa hver og einn frá vorum verstu vegum.
Og Drottinn hefur vakað yfir oss til ills og leitt það yfir oss, því að Drottinn er réttlátur í öllum verkum sínum, sem hann hefur oss boðið.
Og vér höfum eigi hlýtt raustu hans, að ganga í boðorðum Drottins, sem hann hefur fyrir oss sett.
Og nú, Drottinn, Guð Ísraels, þú sem leiddir lýð þinn út af Egyptalandi með sterkri hendi og með táknum og með undrum og með þínum mikla mætti og með voldugum armlegg, og hefur gjört þér nafn eins og á þessum degi:
Vér höfum syndgað, vér höfum óguðlega breytt, vér höfum ranglátlega gjört, Drottinn, Guð vor, gegn öllum réttlætisdómum þínum.
Lát reiði þína frá oss snúa, því að vér erum eftir skildir fáir meðal þjóðanna, þar sem þú hefur oss tvístrað.
Heyr, Drottinn, bænir vorar og grátbeiðnir vorar, og frelsa oss þín sjálfs vegna; og gef, að vér megum náð finna í augum þeirra, sem oss hafa burt leitt,
að öll jörðin megi vita, að þú ert Drottinn, Guð vor, og að nafn þitt er nefnt yfir Ísrael og yfir niðja hans.
Lít niður til vor, Drottinn, frá þínu heilaga húsi, og hneig eyra þitt og heyr oss.
Opna augu þín og sjá: því að hinir dánu, sem í helju eru, hverra andi er tekinn burt úr iðrum þeirra, munu eigi gefa Drottni dýrð og réttlæti;
en sálin, sem hrygg er sakir mikilleiks þess illa, sem hún hefur gjört, og gengur bogin og máttfarin, og augun, sem daprast, og hin hungraða sál — þau gefa þér, Drottni, dýrð og réttlæti.
Því að eigi er það sakir réttlætis feðra vorra, að vér úthellum bænum vorum og biðjum miskunnar frammi fyrir þér, Drottinn, Guð vor;
heldur af því að þú hefur sent út reiði þína og heift þína yfir oss, eins og þú hefur talað fyrir hönd þjóna þinna, spámannanna, og sagt:
Svo segir Drottinn: Hneigið öxl yðar og háls yðar og þjónið Babýlonkonungi, og þér skuluð verða kyrrir í landinu, sem eg hef gefið feðrum yðar.
En ef þér viljið eigi hlýða raustu Drottins, Guðs yðar, að þjóna Babýlonkonungi, þá mun eg láta yður fara burt úr borgum Júda og utan Jerúsalem.
Og eg mun taka frá yður raust gleðinnar og raust fagnaðarins og raust brúðgumans og raust brúðarinnar, og alt landið mun verða án nokkurs fótspors íbúa.
Og þeir hlýddu eigi raustu þinni, að þjóna Babýlonkonungi; og þú hefur staðfest orð þín, sem þú talaðir fyrir hendur þjóna þinna, spámannanna, að bein konunga vorra og bein feðra vorra skyldu færð verða burt úr stað sínum.
Og sjá, þeim er út kastað í hita sólarinnar og í frost næturinnar; og þeir hafa dáið í þungum kvölum, af hungri og af sverði og í útlegð.
Og þú hefur gjört musterið, sem nafn þitt var nefnt yfir, eins og það er á þessum degi, sakir ranglætis húss Ísraels og húss Júda.
Og þú hefur breytt við oss, Drottinn, Guð vor, eftir allri gæsku þinni og eftir allri þinni miklu miskunn,
eins og þú talaðir fyrir hönd þjóns þíns Móse á þeim degi, er þú bauðst honum að rita lögmál þitt frammi fyrir börnum Ísraels,
og sagðir: Ef þér viljið eigi heyra raust mína, mun þessi mikli fjöldi verða að mjög litlum hóp meðal þjóðanna, þar sem eg mun tvístra þeim.
Því að eg veit, að lýðurinn mun eigi heyra mig, því að þeir eru harðsvíraður lýður; en þeir munu snúa sér að hjarta sínu í landi herleiðingar sinnar,
og þeir munu vita, að eg er Drottinn, Guð þeirra; og eg mun gefa þeim hjarta, og þeir munu skilja, og eyru, og þeir munu heyra.
Og þeir munu lofa mig í landi herleiðingar sinnar og minnast nafns míns
og snúa sér frá harðsvíruðum hálsi sínum og frá óguðlegum verkum sínum; því að þeir munu minnast vegar feðra sinna, sem syndguðu gegn mér.
Og eg mun leiða þá aftur inn í landið, sem eg hét feðrum þeirra með eiði — Abraham, Ísak og Jakob — og þeir skulu drottnar þess vera; og eg mun margfalda þá, og þeim mun eigi fækka.
Og eg mun gjöra við þá annan sáttmála, sem eilífur skal vera, að vera þeirra Guð, og þeir skulu vera minn lýður; og eg mun eigi framar burt flytja lýð minn, börn Ísraels, úr landinu, sem eg hef þeim gefið.