Gamla testamentiðSpámennirnir
Spádómur um Egiptaland. Sjá, Drottinn ekur á léttfæru skýi og kemur til Egiptalands. Þá skjálfa goð Egiptalands fyrir honum og hjörtu Egipta bráðna í brjóstum þeirra.
Og eg æsi Egipta í gegn Egiptum, svo að bróðir skal berjast við bróður, vinur við vin, borg við borg og ríki við ríki.
Hyggindi Egipta munu þá verða örþrota, og ráðagjörðir þeirra ónýti eg. Þeir munu leita frétta hjá goðum sínum, hjá galdramönnum, þjónustuðndum og spásagnaröndum.
Eg vil selja Egipta harðráðum drotnara á vald, og grimmur konungur skal ríkja yfir þeim, segir Drottinn, Drottinn hersveitanna.
Vötnin í sjónum munu þverra, og fljótið grynnast og þorna upp.
Árkvíslarnar munu fúlna, fljót Egiptalands þverra og þorna, reyr og sef visna.
Engjarnar fram með Níl, á sjálfum Nílar-bökkunum,.og öll sáðlönd við Níl þorna upp, eyðast og hverfa.
Þá munu fiskimennirnir andvarpa og allir þeir sýta, sem öngli renna í Níl, og þeir, sem leggja net í vötn, munu örvilnast.
Þeir, sem vinna hörinn, mun! standa ráðþrota, kembingarkonurnar og vefararnir blikna.
Stoðir landsins skulu brotnar verða sundur, allir þeir, sem vinna fyrir kaup, verða hugdaprir.
Höfðingjarnir í Zóan eru tómir heimskingjar, ráðspekin hjá hinum vitrustu ráðgjöfum Faraós orðin að flónsku. Hvernig dirfist þér að segja við Faraó: Eg er sonur vitringanna og kominn af fornkonungunum?
Hvar eru nú vitringar þínir? Þeir ættu nú að segja þér, og mega vita, hverja fyrirætlan Drottins hersveitanna hefir með Egiptaland.
Höfðingjarnir í Zóan standa eins og afglapar, höfðingjarnir í Nóf eru á tálar dregnir. Þeir, sem eru hyrningarsteinar ættkvísla Egiptalands, hafa leitt það á glapstigu.
Drottinn hefir byrlað þeim sundlunar-anda, svo að þeir valda því, að Egiptaland er á reiki í öllum fyrirtækjum sínum, eins og drukkinn maður reikar innan um spýju sína;
ekkert hepnast Egiptalandi, hvorki það sem höfuð eða hali, pálmakvistur eða sefstrá taka sér fyrir að gjöra.
Á þeim degi munu Egiptar verða sem konur, þeir munu skelfast og hræðast reidda hönd Drottins hersveitanna, er hann reiðir gegn þeim.
Þá skal Egiptalandi standa ótti af Júdalandi; í hvert sinn sem á það er minst við þá, munu þeir skelfast, vegna ráðs þess, er Drottinn hersveitanna hefir ráðið gegn þeim.
Á þeim degi munu fimm borgir í Egiptalandi mæla á kanverska tungu og sverja hlýðni Drottins hersveitanna; skal sérhver þeirra kallast bær réttvísinnar.
Á þeim degi mun vera altari handa Drottni í miðju Egiptalandi og merkissteinn handa Drottni við landamærin.
Það skal vera til merkis og vitnisburðar um Drottin hersveitanna í Egiptalandi; þegar þeir hrópa til Drottins undan kúgurunum, mun hann senda þeim fulltingjara og forvígismann, er frelsar þá.
Drottinn mun kunnur verða Egiptalandi, og Egiptar munu þekkja Drottin á þeim degi; þeir munu dýrka hann með sláturfórnum og matfórnum, og vinna Drottinn heit og efna þau.
Og Drottinn mun slá Egiptaland, slá og græða, og þeir munu snúa sér til Drottins, og hann mun bænheyra þá og græða þá.
Á þeim degi skal vera brautarvegur frá Egiptalandi til Assýríu; og Ássýringar skulu koma til Egiptalands og Egiptar til Assýríu, og Egiptar munu tilbiðja ásamt Assýringum.
Á þeim degi munu þessir þrír taka saman: Ísrael, Egiptaland og Assúr og vera blessun á jörðinni miðri;
því að Drottinn hersveitanna blessar þá og segir: Blessuð sé þjóð mín Egiptar, verkið handa minna Assúr og arfleifð mín Ísrael!