Gamla testamentiðLögmálið
Nú flutti Abraham sig þaðan suður í landið og settist að milli Kades og Súr, og dvaldist um hríð í Gerar.
Og Abraham sagði um Söru konu sína: Hún er systir mín. Þá sendi Abímelek konungur Gerar menn og lét sækja Söru.
En Guð kom til Abímeleks í draumi um nóttina og sagði við hann: Sjá, þú skalt deyja vegna konu þeirrar, sem þú hefir tekið, því að hún er gift kona.
En Abimelek hafði ekki komið nærri henni. Og hann sagði: Drottinn, munt þú: einnig vilja deyða saklaust fólk?
Hefir hann ekki sagt við mig: Hún er systir mín? og hún sjálf hefir einnig sagt: Hann er bróðir minn. Í einlægni hjarta míns og með hreinum höndum hefi eg gjört þetta.
Og Guð sagði við hann í draumnum: Víst veit eg, að þú gjörðir þetta í einlægni hjarta þíns, og eg hefi einnig varðveitt þig frá að syndga gegn mér; fyrir því leyfði eg þér ekki að snerta hana.
Fá því nú manninum konu hans aftur, því að hann er spámaður; og mun hann biðja fyrir þér, að þú megir lífi halda; en ef þú skilar henni ekki aftur, þá skalt þú vita, að þú munt vissulega deyja, þú og allir, sem þér til heyra.
Og Abímelek reis árla um morguninn og kallaði til sín alla þjóna sína og greindi þeim frá öllu þessu; og mennirnir urðu mjög óttaslegnir,
Og Abímelek lét kalla Abraham til sín og sagði við hann: Hvað hefir þú gjört oss? og hvað hefi eg misgjört við þig, að þú skyldir leiða svo stóra synd yfir mig og ríki mitt? Verk, sem enginn skyldi fremja, hefir þú framið gegn mér.
Og Abímelek sagði við Abraham: Hvað gekk þér til að gjöra þetta?
Þá mælti Abraham: Eg hugsaði: Vart mun nokkur guðsótti vera á þessum stað, og þeir munu drepa mig vegna konu minnar.
Og þar að auki er hún sannlega systir mín, samfeðra, þótt eigi séum við sammæðra, og hún varð kona mín.
Og þegar Guð lét mig fara úr húsi föður míns, sagði eg við hana: Þessa góðsemi verður þú að sýna mér: hvar sem við komum, þá segðu um mig: Hann er bróðir minn.
Þá tók Abímelek sauði, naut, þræla og ambáttir, og gaf Abraham og fékk honum aftur Söru konu hans.
Og Abímelek sagði: Sjá, land mitt stendur þér til boða; bú þú þar sem þér bezt líkar.
Og við Söru sagði hann: Sjá, eg gef bróður þínum þúsund sikla silfurs. Sjá, það sé þér uppreist í augum allra þeirra, sem með þér eru, og ert þú þannig réttlætt fyrir öllum.
Og Abraham bað til Guðs fyrir honum, og Guð læknaði Abímelek og konu hans og ambáttir, svo að þær ólu börn.
Því að Drottinn hafði lokað sérhverjum móðurkviði í húsi Abímeleks sakir Söru, konu Abrahams.