Gamla testamentiðSaga
Og Davíð mælti: Þetta sé hús Drottins Guðs, og þetta sé altari fyrir brennifórnir Ísraels.
Og Davíð bauð að stefna saman útlendingum þeim, er voru í Ísraelslandi, og hann setti steinhöggvara til þess að höggva til steina, til þess að reisa af musteri Guðs.
Davíð dró og að afarmikið af járni í nagla á hliðhurðirnar og í spengurnar, og svo mikið af eiri, að eigi varð vegið,
og sedrustré, svo að eigi varð tölu á komið, því að Zidoningar og Týrverjar færðu Davíð afarmikið af sedrustrjám.
Davíð hugsaði með sér: Salómó sonur minn er ungur og óþroskaður, en musterið, er Drottinn á að reisa, á að vera afarstórt, til frægðar og prýði um öll lönd. Eg ætla því að viða að til þess. Og Davíð viðaði afarmikið að fyrir andlát sitt.
Síðan kallaði hann Salómó son sinn, og fól honum að reisa musteri Drottni, Guði Ísraels.
Og Davíð mælti við Salómó: Sonur minn! Eg hafði í hyggju að reisa musteri nafni Drottins, Guðs míns.
En orð Drottins kom til mín, svolátandi: Þú hefir úthelt miklu blóði og háð miklar orustur; þú skalt eigi reisa musteri nafni mínu, því að miklu blóði hefir þú helt til jarðar fyrir augliti mínu.
En þér mun sonur fæðast; hann mun verða kyrlátur maður, og eg mun veita honum ró fyrir öllum fjandmönnum hans alt um kring, því að Salómó skal hann heita, og eg mun veita frið og kyrð í Ísrael um hans daga.
Hann skal reisa musteri nafni mínu; hann skal vera mér sonur, og eg honum faðir, og eg mun staðfesta konungsstól hans yfir Ísrael að eilífu.
Drottinn sé nú með þér, sonur minn, svo að þú verðir auðnumaður og reisir musteri Drottins, Guðs þíns, eins og hann hefir um þig heitið.
Veiti Drottinn þér aðeins hyggindi og skilning og skipi þig yfir Ísrael, og að þú megir varðveita lögmál Drottins, Guðs þíns.
Þá munt þú auðnumaður verða, ef þú varðveitir setninga þá og boðorð og breytir eftir þeim, er Drottinn lagði fyrir Móse um Ísrael. Ver þú hughraustur og öruggur! Óttast ekki og ver hvergi hræddur.
Sjá, þrátt fyrir þrautir mínar hefi eg dregið að til musteris Drottins hundrað þúsund talentur gulls, miljón talentur silfurs, og svo mikið af eiri og járni, að eigi verður vegið, því að afarmikið er af því. Viða og steina hefi eg einnig aflað, og mátt þú þar enn við auka.
Með þér er og margt starfsmanna, steinhöggvarar, steinsmiðir og trésmiðir og alls konar hagleiksmenn til alls konar smíða
af gulli, silfri, eiri og járni, er eigi verður tölu á komið. Upp nú, og tak til starfa og Drottinn sé með þér.
Og Davíð bauð öllum höfðingjum Ísraels að liðsinna Salómó syni sínum og mælti:
Drottinn, Guð yðar er með yður og hefir veitt yður frið alt um kring, því að hann hefir selt frumhyggja landsins mér á vald, og landið er undirokað fyrir augliti Drottins og fyrir augliti lýðs hans.
Beinið þá hjörtum yðar og hug yðar að því að leita Drottins, Guðs yðar; takið yður til og reisið helgidóm Drottins Guðs, svo að þér getið flutt sáttmálsörk Drottins og hin helgu áhöld Guðs í musterið, er reisa á nafni Drottins.