Gamla testamentiðLögmálið
Og þegar alt þetta, blessunin og bölvunin, sem eg hefi lagt fyrir þig í dag, kemur fram við þig, og þú hugfestir það meðal allra þeirra þjóða, er Drottinn, Guð þinn, rekur þig til,
og þú snýr þér aftur til Drottins, Guðs þíns, og hlýðir raustu hans í öllu, sem eg býð þér í dag, bæði þú og börn þín, af öllu hjarta þínu og af allri sálu þinni,
þá mun Drottinn, Guð þinn, snúa við högum þínum og miskunna þér og safna þér aftur saman frá öllum þjóðum, þeim er Drottinn, Guð þinn, hefir dreift þér á meðal.
Þótt þínir brottreknu væru yzt við skaut himins, þá mun Drottinn, Guð þinn, saman safna þér þaðan og sækja þig þangað;
og Drottinn, Guð þinn, mun leiða þig inn í landið, sem feður þínir áttu, og þú skalt taka það til eignar, og hann mun gjöra enn betur til þín og fjölga þér enn meir en feðrum þínum.
Og Drottinn, Guð þinn, mun umskera hjarta þitt og hjarta niðja þinna, svo að þú elskir Drottinn, Guð þinn, af öllu hjarta þínu og af allri sálu þinni, til þess að þú megir lifa.
Og Drottinn, Guð þinn, mun láta allar þessar bölvanir bitna á óvinum þínum og fjendum, þeim er hafa ofsótt þig.
En þú munt aftur hlýða raustu Drottins og halda allar skipanir hans, þær er eg legg fyrir þig í dag;
og Drottinn, Guð þinn, mun veita þér gnægð gæða í öllu, sem þú tekur þér fyrir hendur, í ávexti kviðar þíns og í ávexti fénaðar þíns og í ávexti lands þíns, því að Drottinn mun aftur gleðjast yfir þér, þér til heilla, eins og hann gladdist yfir feðrum þínum,
ef þú hlýðir raustu Drottins, Guðs þíns, og varðveitir skipanir hans og lög, sem rituð eru í þessari lögmálsbók, ef þú snýr þér til Drottins, Guðs þíns, af öllu hjarta þínu og af allri sálu þinni.
Því að þetta boðorð, sem eg legg fyrir þig í dag, er þér eigi um megn og það er eigi fjarlægt þér.
Ekki er það uppi í himninum, svo að þú þurfir að segja: Hver ætti fari fyrir oss upp í himininn og sæki það handa oss og kunngjöri oss það, svo að vér megum breyta eftir því?
Og það er eigi hinumegin hafsins, svo að þú þurfir að segja: Hver ætti fari fyrir oss yfir hafið og sæki það handa oss og kunngjöri oss það, svo að vér megum breyta eftir því?
Heldur er orðið harla nærri þér, í munni þínum og hjarta þínu, svo að þú getur breytt eftir því.
Sjá, eg hefi í dag lagt fyrir þig líf og heill, dauða og óheill.
Ef þú hlýðir skipunum Drottins, Guðs þíns, þeim er eg legg fyrir þig í dag: að elska Drottin, Guð þinn, ganga á hans vegum og varðveita skipanir hans, lög og ákvæði, þá munt þú lifa og margfaldast, og Drottinn, Guð þinn, mun blessa þig í landi því, er þú heldur nú inn í, til þess að taka það til eignar.
En ef hjarta þitt gjörist fráhverft og þú verður óhlýðinn og lætur tælast til að falla fram fyrir öðrum guðum og dýrka þá,
þá boða eg yður í dag, að þér munuð gjörsamlega farast; þér munuð þá eigi lifa mörg árin í landi því, er þér haldið nú inn Í yfir Jórdan, tl þess að taka það til eignar.
Eg kveð í dag bæði himin og jörð til vitnis móti yður, að eg hefi lagt fyrir þig lífið og dauðann, blessunina og bölvunina; veldu þá lífið, til þess að þú og niðjar þínir megi lifa,
með því að elska Drottin, Guð þinn, hlýða raustu hans og halda þér fast við hann — því að undir því er líf þitt komið og langgæður aldur þinn, svo að þú megir búa í landinu, sem Drottinn sór feðrum þínum: Abraham, Ísak og Jakob, að gelá þeim.