Gamla testamentiðSpámennirnir
Og orð Drottins kom til mín, svo hljóðandi:
Manns-son, spá þú um Ísraels hirða, spá þú og seg við þá: Svo segir Drottinn Guð: Vei hirðum Ísraels, er héldu sjálfum sér til haga. Eiga ekki hirðarnir að halda sauðunum til haga?
Mjólkurinnar neyttuð þér, klædduð yður af ullinni, slátruðuð alifénu, en sauðunum hafið þér eigi haldið til haga.
Þér komuð ekki þrótti í veiku skepnurnar og læknuðuð ekki hið sjúka, bunduð ekki um hið limlesta, sóttuð ekki það, er hrakist hafði, og leituðuð ekki hins týnda, heldur drotnuðuð þér yfir þeim með hörku og grimd.
Og fyrir því tvístruðust þeir, af því að enginn var hirðirinn, og urðu öllum dýrum merkurinnar að bráð.
Sauðir mínir ráfuðu um öll fjöll og allar háar hæðir; sauðir mínir voru tvístraðir um alt landið, og enginn skeytti um þá og enginn leitaði þeirra.
Heyrið því orð Drottins, þér hirðar!
svo sannarlega sem eg lifi, segir Drottinn Guð: Vissulega, af því að sauðir mínir urðu að herfangi og af því að sauðir mínir urðu öllum dýrum merkurinnar að bráð, með því að enginn var hirðirinn og með því að hirðar mínir skeyttu eigi um sauði mína, — því að hirðarnir héldu sjálfum sér til haga, en sauðum mínum héldu þeir ekki til haga —
fyrir því heyrið orð Drottins, þér hirðar!
Svo segir Drottinn Guð: Sjá, eg skal finna hirðana og eg skal krefja sauða minna af hendi þeirra og gjöra enda á fjárgæzlu þeirra; og hirðarnir skulu ekki lengur halda sjálfum sér til haga, heldur skal eg hrífa sauði mína úr munni þeirra, svo að þeir verði þeim eigi framar að bráð.
Því að svo segir Drottinn Guð: Hér er eg sjálfur og mun leita sauða minna og annast þá.
Eins og hirðir annast hjörð sína þann dag, sem hann er á meðal hinna tvístruðu sauða sinna, þannig mun eg annast sauði mína og heimta þá úr öllum þeim stöðum, þangað sem þeir hröktust í þokunni og dimmviðrinu.
Og eg mun sækja þá til þjóðanna og saman safna þeim úr löndunum og leiða þá inn í land þeirra og halda þeim til haga á Ísraels fjöllum, í dölunum og á öllum bygðum bólum í landinu.
Eg mun halda þeim í góðu haglendi, og beitiland þeirra mun vera á háfjöllum Ísraels; þar munu þeir liggja í góðu beitilandi og ganga í feitu haglendi á Ísraels fjöllum.
Eg mun sjálfur halda sauðum mínum til haga og sjálfur bæla þá, segir Drottinn Guð.
Eg mun leita að hinu týnda og sækja hið hrakta, binda um hið limlesta og koma þrótti í hið veika, en varðveita hið feita og sterka; eg mun halda þeim til haga, eins og vera ber.
En þér, sauðir mínir, — svo segir Drottinn Guð: Sjá, eg dæmi milli kindar og kindar, milli hrúta og hafra.
Nægir yður ekki að ganga í hinu bezta haglendi, nema þér fótum troðið það, sem eftir €F af haglendi yðar? nægir yður ekki að drekka tæra vatnið, nema þér gruggið upp það, sem eftir er, með fótum yðar?
Og svo verða sauðir mínir að bíta það, sem þér hafið troðið með fótum yðar, og drekka það, sem þér hafið gruggað upp með fótum yðar.
Fyrir því segir Drottinn Guð svo: Sjá, hér er eg sjálfur og dæmi milli hinnar feitu og hinnar mögru kindar.
Af því að þér hrunduð öllum veiku skepnunum með síðum og öxlum og stönguðuð þær með hornum yðar, unz þér fenguð hrakið þær út,
þá vil eg nú hjálpa sauðum mínum, svo að þeir verði eigi framar að herfangi, og eg mun dæma milli kindar og kindar.
Og eg mun skipa yfir þá einkahirði, hann mun halda þeim til haga, þjón minn Davíð. Hann mun halda þeim til haga og hann mun vera þeim hirðir.
Og eg, Drottinn, mun vera Guð þeirra, og þjónn minn Davíð mun vera höfðingi meðal þeirra; eg, Drottinn, hefi talað það.
Og eg mun gjöra friðarsáttmála við þá og reka öll illdýri úr landinu, svo að þeir skulu óhultir búa mega í eyðimörkinni og sofa í skógunum.
Og eg mun gjöra þá að blessun og það sem er umhverfis hæð mína, og eg mun láta steypiregnið niður falla á sínum tíma; það skulu veiða blessunarskúrir.
Og tré merkurinnar munu bera sinn ávöxt, og jörðin mun bera sinn gróða, og þeir munu búa óhultir á sinni jörð og viðurkenna, að eg er Drottinn, þegar eg sundurbrýt okstengur þeirra og frelsa þá undan valdi þeirra, er þá hafa þrælkað.
Og þeir skulu ekki framar verða þjóðunum að herfangi, né heldur skulu villidýrin rífa þá í sig; en þeir skulu búa óhultir og enginn skelfa þá.
Og eg mun láta til verða handa þeim vel ræktaðan gróðurreit og alls engir munu framar farast af hungri í landinu, og þeir skulu ekki framar liggja undir ámæli þjóðanna.
Og þeir skulu viðurkenna, að eg, Drottinn, Guð þeirra, er með þeim, og að þeir, Ísraelsmenn, eru mín þjóð, segir Drottinn Guð.
En þér eruð mínir sauðir; mín gæzluhjörð eruð þér; eg er yðar Guð, segir Drottinn Guð.